我家有個宅長老 我由結婚開始就同奶奶一齊住, 上年奶奶不幸中風, 慶幸只係輕微, 行動明顯變慢咗, 但頭腦依然清醒。
不過對於一位習慣晨運, 落街買餸嘅佢, 尤其係疫症高峰過後, 佢變得越來越唔想出街,平時嘅一般活動都唔想做, 令我同老公都有啲擔心佢有抑鬱。 嘗試提出陪佢去飲茶,佢都非常唔願意, 總之唔想離開屋企落街... 見今日太陽好, 就想同佢去公園行個圈, 因為佢真係好耐無曬下太陽.. 一陣又話唔想, 一陣又話好麻煩, 氹完又氹, 終於皇恩特赦, 俾我煩到佢話好。換衫著鞋, 準備其他細軟, 好嘞!公園我哋嚟喇!天氣好空氣又好, 行咗一陣搵到個涼庭同佢坐下。 佢睇住啲雀仔微微笑,其實佢係開心嘅!我問佢點解你唔肯落街,佢一句就話自己出入要人幫手,有時又驚跌又驚自己行得慢,又話覺得會煩到我哋,原來佢真係唔開心! 我同傾咗一陣,同佢講我明白佢嘅顧慮,但係身體係需要舒展下,唔洗日日去但間唔時都要出去呼吸一下,最終約實咗佢只要唔落雨,每星期日我地去公園或者附近行一轉,輕輕鬆鬆。
其實奶奶都係諗埋我哋嗰份。我哋其實安學佢以同理心加埋耐性係佢嘅角度諗一諗。毅力同牙力當然唔少得。始終佢係大人唔係細路,我哋同佢行到幾多得幾多... 因為原來佢快樂我都會快樂! |
二嫂,點解有咁多螞蟻係地下? 放長假期,一家三口趁機會出去郊外走走, 帶住囝囝快閃一個城門水塘簡單家樂徑。風和日麗一路行一路見到好多馬騮跑嚟跑去,仔仔就興奮莫名仲話要餵佢哋食嘢!終於搵到一個陰涼嘅樹下可以坐低食嘢,正聽住雀仔唱歌,享受微風之際電話就响起嚟,係老爺..
「喂!喂! 二嫂二嫂!」 「爺爺, ,係二嫂呀,咩事?」我超大聲以免爺爺聽唔到,全場立刻變得安靜,就只有我嘅聲音。 「二嫂,屋企有好多螞蟻,成地都係…你快啲嚟幫我睇下!」 我問:「姐姐係唔係到?」「佢係到但話見唔到,其實成地都有,你快啲嚟睇下!」 掛上電話,第一時間同老公講然後就匆匆忙忙執好啲嘢我哋就起程去爺爺屋企睇下發生咩事。
去到爺爺屋企問姐姐姐咩事,佢話爺爺成朝都講地下好多蟻,但係其實真係一隻都冇。 似乎爺爺懵懵地又有幻覺問非所答,好唔妥… 平時姐姐都好可靠同又好有交帶,連佢話無咩特別嘢發生。 同老公商量後,決定留低阿仔喺爺爺屋企同,急急忙忙帶爺爺去法國醫院睇急症。去到醫院,爺爺都依然話有好多蟻 。 醫生問咗佢好多問題,問爺爺有咩長期病,食開咩藥, 又做老人癡呆問卷但一切都無法定斷係咩原因。 於是醫生話安全起見,叫我哋照過MRI仲叫爺爺留院觀察,睇下係咪有咩其他原因。乖仔老公當然無異議。 第二日睇報告醫生話一切又正常而爺爺亦好似正常返,無話見到螞蟻。我隨之問佢琴日有冇做過啲咩唔同,佢就話無…瞓覺食飯食藥睇電視,一切如常。
我重覆再問幾時開始見到蟻,又再問工人姐姐,終於.... 終於迷團解開.... 爺爺應該自己食多咗藥! 佢堅持話姐姐食完飯無俾藥佢食,於是佢自己去攞藥食,但其實已經食咗。問佢食咗邊隻幾多粒,佢依依唷唷講橙色黃白色都食,同平時一樣但就唔記得邊隻食咗幾多粒。 唉…即刻再問醫生,爺爺似係食多咗藥所以產生幻覺,宜家佢清醒返,於是係醫院觀察多一晚,一切正常就出院。 就係咁洗咗差唔多兩皮嘢…. 樂活之道...一個簡單藥盒可以避免家人尤其老人誤用或超量用藥。 |
佢好難接受自己中咗風 仲記得嗰晚媽媽冇嚟我屋企食飯,不以為意亦都冇打電話去問下佢有冇約人,就係咁原來佢嗰晚中風跌咗喺佢屋企床邊...
雖然唔係好嚴重,住院大約三個禮拜就出院, 左邊身體變得有啲唔協調,但媽媽就係媽媽, 一下子無辦法接受同承認自己中過風,都依然堅持有好多嘢要自己嚟!七十幾歲嘅佢依然話自己行到,自己食到嘢,無問題, 話我哋擔心太多!呢一刻嘅我真係又嬲又忟憎,但又唔想同佢嘈交,只可以叫自己工人姐姐過嚟暫時睇住佢行,再從長計議。 尚算有幸,好快就幫媽媽請到一個好嘅姐姐而佢嘅病情雖無太大好轉但最少無惡化。但明顯佢行動係比以前差咗,不過佢又點會承認呀! 好彩佢都願意攞住支拐杖,行動慢啲但係依然堅持自己去完成去廁所,出廳, 去飯枱...總之就要自己行啦。 當一切覺得冇事嘅時候,一日臨天光事情就發生啦! 電話響佢姐姐打嚟,話媽媽係走廊跌倒,不過佢清醒冇咩大礙. 有你冇你即刻跑過去佢屋企,媽媽話佢只係去廁所途中跌倒唔會有事, 當然仲話我小題大做佢一啲事都冇啦!不過我就梗係同佢去檢查。 醫生話佢可能係一時腳軟亦可能有一個輕微嘅二次中風,好彩係唔嚴重,暫時無察覺太大問題,先叫我哋返屋企觀察一下。
返到屋企我冇怪責姐姐但叫佢要小心啲醒瞓少少;最小媽媽落床佢哋知道。 同朋友傾訴嘅時候,發現原來有報鳴產品可以提醒佢落床。 二話不說買咗一件返,咁每當媽媽落床姐姐都知道,最少可以避免一啲不必要嘅意外。 我明白以媽媽嘅性格,要照顧佢都唔係一件容易事。 只希望我哋能盡子女嘅責任, 令佢安全舒適咁慢慢接受佢年老嘅現實。 |